ದೊಡ್ಡಬಳ್ಳಾಪುರ ನಗರಸಭೆ ಬಜೆಟ್ ಹಳೆಯ ಯೋಜನೆಗಳ ಹೊಸ ಬಜೆಟ್ ಎಂದು ಟೀಕಿಸಿದ ಸದಸ್ಯರು

ಹಿರಿಯ  ನಗರಸಭಾ ಸದಸ್ಯ ಎಂ.ಜಿ.ಶ್ರೀನಿವಾಸ್ ಮಾತನಾಡಿ, ನಗರಸಭೆ ಆಯುಕ್ತರು ಹಾಗೂ ಅಧಿಕಾರಿಗಳು ಜಮಾ ಖರ್ಚುಗಳನ್ನು ಸರಿಯಾಗಿ ಇಟ್ಟುಕೊಳ್ಳದ ಕಾರಣ ಇಂತಹ ಆಯವ್ಯಯ ಮಂಡನೆಯಾಗಿದೆ. 67.21 ಕೋಟಿ ಅಂದಾಜು ಆದಾಯವಿದ್ದರೆ, ಖರ್ಚು 65.66ಕೋಟಿ ತೋರಿಸಲಾಗಿದೆ. ಕೇವಲ 1.5 ಕೋಟಿ ಉಳಿತಾಯ ತೋರಿಸಲಾಗಿದೆ. ದಸ್ತಾವೇಜುಗಳು ಸರಿಯಾಗಿದ್ದಿದ್ದರೆ ಉತ್ತಮ ಬಜೆಟ್ ಕೊಡಬಹುದಿತ್ತು ಎಂದು ಅಭಿಪ್ರಾಯಪಟ್ಟರು.

ನಗರಸಭೆ ಅಧ್ಯಕ್ಷರು ಮಹಿಳೆ ಎಂಬ ನೆರಳಿನಿಂದ ಹೊರಬಂದು ಜವಾಬ್ದಾರಿ ನಿರ್ವಹಿಸಿಲ್ಲ ಉಳಿದ ಅವಧಿಯಲ್ಲಾದರೂ ತಮ್ಮ ಸಾಮರ್ಥ್ಯ ತೋರಿಸಲಿ ಎಂದು ಹೇಳಿದರು. ಜೊತೆಗೆ ಸ್ಥಳೀಯ ಎಲ್ಲ ಜನಪ್ರತಿನಿಧಿಗಳನ್ನು ವಿಶ್ವಾಸಕ್ಕೆ ತೆಗೆದುಕೊಂಡು ಕೆಲಸ ಮಾಡಿದರೆ ಅಭಿವೃದ್ಧಿ ಸಾಧ್ಯವಾಗಲಿದೆ ಎಂದರು.

ಮತ್ತೊಬ್ಬ ಹಿರಿಯ ಸದಸ್ಯ ತ.ನ.ಪ್ರಭುದೇವ್  ಮಾತನಾಡಿ, ಕೇವಲ ಅಂಕಿ ಅಂಶದ ಬಜೆಟ್ ಆಗಿದೆ. ವಾಸ್ತವಾಂಶದ ಬಜೆಟ್ ಅಲ್ಲ ಎಂದು ಹೇಳಿದರು.

ನಗರಸಭೆ ಮೂಲಗಳ ಆದಾಯ ಸಮರ್ಪಕವಾಗಿ ಸಂಗ್ರಹವಾದರೆ ಮಾತ್ರ ಅಭಿವೃದ್ಧಿ ಸಾಧ್ಯ ಜಾಹೀರಾತು ಫಲಕಗಳ ಅಳವಡಿಕೆಗೆ ಟೆಂಡರ್ ಕರೆದು ಆದಾಯ ಹೆಚ್ಚಳ ಮಾಡಿಕೊಳ್ಳಬೇಕು. ನಿವೇಶನ, ಜಮೀನು ನೋಂದಣಿಯಲ್ಲಿ ನಗರದ್ದು ಬಹುಪಾಲಿದೆ. ಆದರೆ, ಉಪ ನೋಂದಾಣಾಧಿಕಾರಿಗಳಿಂದ ಈವರೆಗೆ ನಮ್ಮಪಾಲಿನ ಶೇ 2 ರಷ್ಟು ಸೆಸ್ ಹಣ ಬಂದಿಲ್ಲ. ಅಧಿಕಾರಿಗಳು ಕೂಡಲೇ ಪತ್ರ ವ್ಯವಹಾರ ನಡೆಸಬೇಕು ಎಂದು ಸೂಚಿಸಿದರು. ವಿದ್ಯುತ್‌ ಚಿತಾಗಾರಕ್ಕೆ ಇಟ್ಟಿರುವ ಅನುದಾನ ಸಾಕಾಗದು. ನಗರದಲ್ಲಿ ನೀರಿಗೆ ಬರ ಬಾರದಂತೆ ನೋಡಿಕೊಳ್ಳಲು ಜಕ್ಕಲಮಡಗು ಜೊತೆಗೆ ತಿಪ್ಪಗಾನಹಳ್ಳಿ

ಕೆರೆ, ಗುಂಡಮಗೆರೆ ಕೆರೆ, ಘಾಟಿಯ ವಿಶ್ವೇಶ್ವರಯ್ಯ ನಾಲೆಯಿಂದಲೂ ನೀರು ಬಳಸಿಕೊಳ್ಳುವ ಬಗ್ಗೆ ಸರ್ಕಾರದ ಜೊತೆ ಮಾತನಾಡಬೇಕು ಎಂದು ಸಲಹೆ ನೀಡಿದರು.

ಸಭೆಯಲ್ಲಿ ಆಯುಕ್ತ ಪರಮೇಶ್, ಸ್ಥಾಯಿ ಸಮಿತಿ ಅಧ್ಯಕ್ಷ ರವಿಕುಮಾರ್, ಉಪಾಧ್ಯಕ್ಷೆ ಫರ್ಹಾನ ತಾಜ್‌ ಇತರರು ಇದ್ದರು.